Y Combinator Winter 2027: O‘zbekiston startaplari uchun $500 000 investitsiya olish imkoniyati

Dunyoning yetakchi startap akseleratorlaridan biri — Y Combinator (YC) Winter 2027 dasturi uchun arizalar qabul qilmoqda. 2027-yil yanvar–mart oylarida AQShning San Fransisko shahrida bo‘lib o‘tadigan dasturda O‘zbekiston startaplari ham ishtirok etishi mumkin. Tanlangan jamoalar $500 000 investitsiya, xalqaro investorlar tarmog‘i va startapni global miqyosda rivojlantirish uchun zarur resurslardan foydalanish imkoniyatiga ega bo‘ladi.

Y Combinator texnologik startaplarni dastlabki rivojlanish bosqichidan boshlab qo‘llab-quvvatlashga ixtisoslashgan xalqaro akselerator hisoblanadi. Dastur davomida founderlar tajribali YC hamkorlari bilan ishlash, biznes modellarini takomillashtirish, mahsulotni rivojlantirish va xalqaro bozorlarga chiqish strategiyalarini shakllantirish imkoniyatiga ega bo‘ladi.

$500 000 investitsiya va global imkoniyatlar

Y Combinator dasturiga qabul qilingan har bir startapga standart shartlar asosida $500 000 investitsiya kiritiladi. Ushbu mablag‘ ikki qismdan iborat:

• $125 000 — kompaniyaning 7 foizlik ulushi evaziga;
• $375 000 — baholash chegarasi belgilanmagan, eng qulay keyingi shartlarga moslashuvchi SAFE (uncapped MFN SAFE) kelishuvi asosida.

Investitsiyadan tashqari, ishtirokchilar Y Combinator’ning global founderlar hamjamiyatiga qo‘shilish, xalqaro investorlar bilan aloqalar o‘rnatish va tajribali YC hamkorlaridan amaliy maslahatlar olish imkoniyatiga ega bo‘ladi.

Shuningdek, dastur ishtirokchilari uchun bulutli infratuzilma, sun’iy intellekt xizmatlari va boshqa texnologik yechimlarni o‘z ichiga olgan $12 milliondan ortiq hamkorlik imtiyozlari, kreditlar va maxsus takliflar mavjud.

Eslatib o‘tamiz, o‘zbekistonlik tadbirkorlar asos solgan startaplar avval ham Y Combinator dasturlariga qabul qilingan. Jumladan, Sardor Rahmatulloyevning Twolabs.ai startapi Spring 2026, Beknazar Abdikamalovning Speko.ai startapi esa Summer 2026 dasturida ishtirok etgan.

Ushbu misollar O‘zbekiston startaplari uchun Y Combinator imkoniyatlaridan foydalanish tajribasi allaqachon mavjudligini ko‘rsatadi.

Kimlar ariza topshirishi mumkin?

Winter 2027 dasturiga ariza topshirish uchun startapning AQShda ro‘yxatdan o‘tgan bo‘lishi talab etilmaydi. Boshqa mamlakatlarda, jumladan, O‘zbekistonda faoliyat yuritayotgan startaplar ham tanlovda qatnashishi mumkin.

Dasturga qabul qilingan jamoalarga investitsiya olish uchun zarur korporativ tuzilmani shakllantirish bo‘yicha yo‘l-yo‘riq ko‘rsatiladi.

Ariza topshirish tartibi

Y Combinator Winter 2027 dasturi 2027-yil yanvar–mart oylarida San Fransisko shahrida bo‘lib o‘tadi.

Arizalar 2026-yil 3-noyabr kuni soat 09:00 gacha (Toshkent vaqti bilan) qabul qilinadi.

Ariza topshirish: https://www.ycombinator.com/apply

Arizalar bevosita Y Combinator’ning rasmiy platformasi orqali yuboriladi. Nomzodlar akseleratorning o‘z tanlov jarayoni asosida baholanadi.